D’Schräinerei vu ProActif huet an de leschte Méint eng ganz Rëtsch vun Holzprodukter entwéckelt, déi elo op de Maart kommen. Et sinn, wéi alles vu ProActif, Produkter « mat Hand an Häerz », déi an den Atelieren vu ProActif zu Contern produzéiert ginn.

Holzbau fir d’Juegd

Fir d’Jeeër bitt ProActif ënnert dem Markennumm „Aus eisem Holz“ eng ganz Gamme un héichwäertegen Hochsitzen : Kanzelen, Ënnerbauten, Drockjuegdbéck, Leederen … a vill nëtzlech Accessoiren dozou. D’Holzzorten déi dobäi verschafft ginn, sinn Douglas a Meläs (Lärche) aus eise Géigenden. All Produit gëtt mat enger detailléierter Uleedung fir den Opbau geliwwert.

Am Katalog fannt dir déi ganz Produktrei mat allen techneschen Detailer.

Holz fir de Gaart a fir d‘Terrass

An der Gamme vun „Aus eisem Holz“ fanne mer och eng ganz Rei flott Objeten fir ronderëm d’Haus: Hochbeeter, Planzkiwwelen, Picknick-Garnituren, Dëscher a Bänken. Alles gëtt aus héichwäertegem Douglas-Holz gebaut, wat wiederfest ass an d’ganzt Joer iwwer kann am Gaart oder op der Terrass stoe bleiwen.

Och dës Produiten fannt dir am Detail beschriwwen am Katalog.

Ausstellungen beim Verband

All dës Produiten ginn iwwert DE VERBAND verkaf. An hiren 3 Geschäfter zu Jonglënster, Colmar-Bierg an Hengescht ass alles ausgestallt, an et kann een sech do vun der éischtklasseger Qualitéit iwwerzeegen.

Well alles an den eegenen Atelieren vu ProActif gemaach gëtt, ass et och kee Problem, individuell Wënsch ze erfëllen an déi Objeten op d‘Mooss ze produzéieren. Iwweregens kënnen d’Ekippe vun der Schäinerei och nach ganz aner Saache maachen, zum Beispill Chaleten, Gaardenhaisercher oder Juegdbuden bauen oder renovéieren. Dofir freet een sech dann am beschten en Devis iwwert den Telefon +352 27 33 44-814, oder iwwert de Kontaktformulaire um Site www.proactif.lu.

E grousse Merci un eise Partner